2005: Nye Frukt- og bærkulturar

Med eit sterktaukande konsum på frukt og bær og ei auka satsing på mangfald i butikkane er tida inne for ei lokal satsing på nye vekstar, slik at frukt- og bærprodusentar i Sogn og Fjordane kan ta del i den verdiskapinga dette representerar.

Landbruket i fylket vert stadig meir konkurranseutsett. I ein konkurransesituasjon er det innovative og framtidsretta miljø som har størst sjanse for å vinne. Det er då avgjerande å tenke nyskaping og produktutvikling. Det er også viktig å tenke mangfald i produksjonen. Det vil gjera det mogeleg å utnytte fleire marknadssegment, og vil gjera frukt- og bærproduksjonen i fylket meir robust og i stand til raskare å tilpasse seg endringar i marknaden. Dei naturgjevne tilhøva for frukt- og bærdyrking er gode i Sogn og Fjordane, fylket har svært dyktige og aktive dyrkarmiljø, viktige bedrifter innan vidareforedling med lang erfaring innan produktutvikling og ein etablert infrastruktur for å handtere frukt og bær.

For å utvikle frukt- og bærnæringa i fylket vert det lagt opp til ei satsing på nye frukt- og bærkulturar gjennom ei systematisk kartlegging av potensielle nye produksjonar. Det er lagt opp til eit forprosjekt for ei første kartlegging av potensielle kulturar, og så ei vidareføring i eit langsiktig basisprosjekt.