"Sats på skulen - snu Sogn!"

Rådmannsgruppa i Sogn regionråd sette den 24.03.06 ned ei arbeidsgruppe for å få vurdert korleis ein kan samarbeide om skuleutvikling i Sogn. Arbeidsgruppa var samansett slik: Vidar Roseth (Balestrand kommune), leiar, Claus Røynesdal (Aurland kommune), Alf Olsen jr (Årdal kommune), Jorunn Nyttingnes (Leikanger kommune). Inger Pedersen (Sogndal kommune) har seinare tiltrådt arbeidsgruppa, og Jan Julusmoen (HSF/fylkesmannen) og Norunn Haugen (Sogn regionråd) har også delteke i arbeidet.

Bakgrunnen for initiativet er tredelt:

1.       Utviklinga i vår region.

Folketalet går tilbake i Sogn, og regionen har ei dårleg utvikling samanlikna med andre delar av fylket. Det har vore strukturelle problem i næringslivet og Sogn framstår har ikkje framstått som mest aktive/dyktige i høve til entreprenørskap og innovasjon. Det er for liten grad av kobling mellom behovet for kompetanse og arbeidskraft i regionen og det utdanningstilbodet som vert gjeve lokalt. Det er eit aukande medvit om at skulen kan vere eit verktøy som kan nyttast for å bidra til å snu denne utviklinga. Gjennom ein partnarskap med fylkeskommunen og ein regionalplan for Sogn vil ein kunne utløyse økonomiske midlar og andre virkemiddel.

2.       Kunnskapsløftet.

Vi står føre gjennomføring av ei reform som skal gje skulen eit løft. Dette stiller auka krav og taler for auka regionalt samarbeid i høve til kompetanseutvikling. Det vert og avsett mykje midlar til kompetanseutvikling i samband med kunnskapsløftet som kan gjere det mogeleg med fleire fellessatsingar.

3.       Kommunane sin rolle som skuleeigarar.

Ein har identifisert desse utfordringane og suksesskriteria:

Utvikle kompetansen hos skuleleiarane innanfor leiing og organisasjon

Endringar i kommunal organisering og aukande krav til endring og styring av skulen inneber at skuleleiarane får ein nøkkelrolle. Det vert viktig å sette skuleleiarane i stand til å drive endringsleiing i lærande organisasjonar, og det vert viktig at dei har blikk for dei samfunnsmessige utfordringane som skulen kan bidra til at regionen møter.

Ut frå dette ser ein det som avgjerande med høg prioritering av eit program for kompetanse-utvikling for skuleleierane.

Kommunen som skuleeigar – sjå skuleutvikling i samanheng med samfunnsutviklinga

Stikkord her er m.a.

-         kunnskap om skulen på politisk nivå og hos administrativ leiing

-         fornuftig tilretteleggjing/utnytting av programfag for val

-         satsing på entreprenørskap

Det er viktig at elevane ser at det er mogeleg å få ei utdanning som kan føre dei inn i arbeidslivet i Sogn, og det er viktig at vi dyktiggjer elevane i høve til å kunne starte eigen verksemd. Det er fyrst gjennom å samle seg om fellestiltak at vi kan få til noko med kvalitet og som monner på desse områda, der det og er ein viktig føresetnad med samarbeid med vidaregåande skular, næringslivet og andre instansar.

Koordinere aktivitet i fagnettverk og sikre at dette arbeidet er forpliktande og målstyrt

Det er viktig å oppretthalde og bygge vidare på den strukturen og kompetansen som er etablert gjennom arbeid i fagnettverk i regionen. Dette har vore ein suksess, og det er ingen grunn til å endre vesentleg på strategien i høve til dette.